Å bruke kroppen er noko av det smartaste ein kan gjere for helsa si, både fysisk og psykisk. Eller for både kropp og sjel, som eg brukar å seie. Eg opplever at også søvnen blir betre dersom eg har brukt kroppen min godt ein dag. Ein lang og god tur med masse frisk luft i kupert terreng er som balsam for sjela.

I overgangsalderen er det mangt og mykje som kan oppstå av både fysiske plager og humørsvingningar. Søvnproblem og hjernetåke er også noko som oppstår.

Eg opplever ei ganske god hjernetåke (kan det være fordi eg har jobba med vær i åresvis, det med tåka, altså?). Eg gløymer og surrar på som berre det. Nokre gongar seier sonen min at eg er heilt umogleg som ikkje hugsar noko som helst. Eg har opplevd ikkje å få sove over fleire netter i strekk, og då kjem hjernetåka endå kraftigare sigande innover ­hovudet mitt. Men god søvn har eg erfart kan hjelpe på. Ei god natt med søvn kan redde inn så mykje. Men for å oppnå det må eg være trøytt når eg legg meg, og det er eg dersom eg har tatt meg tid til å bruke kroppen i løpet av dagen.